Qeveria e Kosovës dhe ajo e Serbisë kanë arritur marrëveshje në Bruksel për targat dhe kthimin e serbëve nëpër institucione, të cilët në mënyrë demonstrative, ditë më parë u larguan nga aty për shkak të “zhgënjimit” të Prishtinës zyrtare.
Burimet e Paparacit kanë thënë për mediumin së marrëveshja mes zëvendëskryeministrit kosovar, Besnik Bislimit dhe kryenegociatorit serb, Petar Petkoviq, nën mbikëqyrjen e emisarit të BE-së për dialog, Miroslav Lajçak, ka bërë që Kosova të pajtohet për shtyrjen e afatit për targat për 10 muaj.
Në këtë marrëveshje parashihet që serbët po ashtu të kthehen në institucionet të Kosovës.
Këtu bëjnë përjashtim deputetët e Listës Serbe që e kanë humbur mandatin, raporton Paparaci.
Po ashtu, palët janë pajtuar që Asociacioni i Komunave me Shumicë serbe të krijohet brenda planit franko-gjerman, i cili sipas shefit të dipomacisë së BE-së, Josep Borrell, i ka veç dy faqe.
Mes tjerash, në ujdinë e arritur thuhet që Serbia nuk do t’i pengojë zgjedhjet ne veri, por do të marrë pjesë në to.
Kryeministri i Kosovës, Albin Kurti, për planin franko-gjerman, ka thënëse është një hap në drejtim të duhur pasi konceptet dhe nocionet që përdoren janë vlera pa dallim prej dakordësive të mëparshme që ishin ideologji e zgjidhjes së problemeve.
Presidentja e Kosovës, Vjosa Osmani, ka caktuar 18 dhjetorin, datë të mbajtjes së zgjedhjeve të jashtëzakonshme për kryetarë të komunave në veri.
BE-ja dhe SHBA-ja kanë kërkuar vazhdimisht nga Qeveria e Kosovës shtyrjen e planit për riregjistrimin e makinave, me qëllim shmangien e tensioneve.
Qeveria e Kosovës, në anën tjetër ka nisur zbatimin e tij më 1 nëntor.
Faza e parë e planit parasheh qortimin e shoferëve që vozisin makina me targa të paligjshme; e dyta parasheh gjoba prej 150 eurosh, ndërsa në të tretën do të shpërndahen targa provuese.
Me këtë plan, pritet që nga 21 prilli i vitit të ardhshëm, në komunikacion të lejohen vetëm makina me targa RKS.
Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, sot zhvilloi takime dypalëshe në Bruksel me Përfaqësuesin e Posaçëm të Bashkimit Evropian për dialogun Kosovë-Serbi, Miroslav Lajčák. /Paparaci.com
